पाल्पा – सिद्धार्थ राजमार्ग अन्तर्गत पाल्पाको तिनाउ गाउँपालिका–३ दोभानमा रहेको निर्माणाधीन सुरुङ मार्ग निर्माणको ६५ प्रतिशत काम सकिएको छ । आयोजनाको वित्तीय प्रगति ५६ प्रतिशत रहेको छ । १ हजार १ सय २६ मिटर लम्बाइ भएको सुरुङ निर्माण सम्पन्न भएको छ ।

१ सय ५१, १ सय ६१ र १ सय ३० मिटर लम्बाइ भएका तीन वटा बाइपास सुरुङको पनि निर्माण सकिएको छ । सुरुङ मार्गसम्म पुग्ने पहुँच सडक, भीर संरक्षण कार्य, रिटेनिङवाल लगायतका संरचना निर्माणाधीन छन् । समग्रमा २ हजार ३ सय ९८ मिटर सडक स्तरोन्नति गर्नुपर्नेछ ।

पहिरो तथा ढुंगा झर्नबाट रोकेर अहिले चालू रहेको सडकलाई सुरक्षित बनाउन ७ सय ८० मिटर लम्बाइ, ३ दशलव ४३ मिटर चौडाइ र ४ दशमलव ४ मिटर उचाई भएको रक सेड निर्माण बाँकी छ । मुख्य सुरुङबाट गाडी चलाउन शुरू भएपछि मात्र रक सेड निर्माण थालिने छ ।

इन्जिनियरिङ, खरिद र निर्माण (इपीसी) मोडलमा सुरुङ मार्ग निर्माणका लागि २०७८ फागुन २५ मा चाइना स्टेट कन्ट्रक्सन इन्जिनियरिङ कर्पोरेसनसँग ७ अर्ब ३४ करोड २१ लाख रुपैयाँमा ठेक्का सम्झौता भएको थियो ।

सिद्धबाबा क्षेत्रमा वर्षायाम र हिउँदमा समेत ढुंगा खस्ने, माटो बगेर आउने तथा सुख्खा पहिरो जाने कारणले थुप्रै दुर्घटना भएर मानवीय क्षति हुँदै आएको छ । वर्षा याममा समस्या झन् विकराल बन्ने गरेको र यसले गर्दा घण्टौं सम्म ट्राफिक अवरोध हुने गरेको छ ।