काठमाण्डाै – निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले प्रतिनिधिसभा सदस्य चुनावमा राजनीतिक दल र उम्मेदवारले बैंकिङ प्रणालीबाट आर्थिक कारोबार गर्नुपर्ने बताउनुभएको छ ।

प्रतिनिधिसभा सदस्य चुनावलाई लक्षित गरि निर्वाचन आयोगले आज निजी क्षेत्रका छाता संस्थासँग गरेको अन्तरक्रियामा कार्यवाहक प्रमुख निर्वाचन आयुक्त भण्डारीले चुनाव समयमा राजनीतिक दल र उम्मेदवारलाई नगद कारोबार नगर्न आग्रह गर्नुभएको हो ।

दल र उम्मेदवारले बैंकिङ प्रणाली विपरीत कारोबार गरे उम्मेदवारी रद्दसम्मका कारबाही गर्न सकिने कानूनी व्यवस्था रहेको पनि कार्यवाहक प्रमुख आयुक्त भण्डारीले बताउनुभयो । उहाँले बङ्गलादेशको जस्तो स्थितिमा गुज्रिनु नपरोस् भनि अनुशासनमा राख्न र लयमा फर्काउन सबै पक्षले चुनावलाई सहयोग गरेको पनि बताउनुभयो ।

चुनाव बिथोल्ने शक्ति अहिले क्षीण भएर गएकाले फागुन २१ गते चुनाव हुने विषयलाई अब कसैले नकार्न नसक्ने कार्यवाहक प्रमुख निर्वाचन आयुक्त भण्डारीको भनाइ थियो ।

राष्ट्रिय झन्डाको दुरुपयोग रोक्न आयोगले सरकारलाई लेखि पठाएपछि गृह मन्त्रालयले सरोकार भएका निकायलाई ध्यानाकर्षण गराइ यसको कार्यविधिअनुसार गर्न आह्वान गरेको उहाँले स्मरण गराउनुभयो ।

आयोगका सचिव कृष्णबहादुर राउतले निजी क्षेत्रले निर्वाचन आचारसंहिता पालनामा सहयोग गर्नुपर्ने बताउनुहुँदै सबैको सहकार्यमा आवधिक चुनाव गराएर लोकतन्त्रलाई स्थायित्व दिनुपर्ने बताउनुभयो । चुनावमा झन्डै ३१ अर्ब रुपैयाँ खर्च हुने जानकारी गराउनुहुँदै उहाँले त्यसबाट उद्योग, व्यवसायलगायत अर्थतन्त्र चलायमान हुने उल्लेख गर्नुभयो ।