चितवन । राष्ट्रिय स्वतन्त्र पार्टी (रास्वपा)का सभापति रवि लामिछानेले आफ्नो पार्टीबाट कसैले त्रसित हुनुपर्ने अवस्था नरहेको बताउँदै सुशासनलाई केन्द्रमा राखेर नयाँ राजनीतिक संस्कार स्थापना गर्ने दाबी गरेका छन्

चितवनमा आयोजित चुनावी सभालाई सम्बोधन गर्दै उनले देशलाई आश्रित होइन, आत्मनिर्भर बनाउने प्रतिबद्धता व्यक्त गरे। “हामीले मागी खाने देश बनाउने होइन, गरी खाने देश बनाउने हो,” उनले भने।

लामिछानेले भदौ २३ र २४ का घटनाहरू स्मरण गर्दै ती दिनहरूमा गोली चलेको र सिंहदरबार जलेको उल्लेख गरे। “सिंहदरबार त्यसैले जलाइयो, जसले त्यसलाई भ्रष्टाचारको अखडा बनायो,” उनले आरोप लगाए।

पुराना दलप्रति लक्षित गर्दै उनले वंशवादमा आधारित राजनीति अब अस्वीकार्य भएको टिप्पणी गरे। “बाबु र बाजेको पार्टी कतै जाँदैन,” भन्दै उनले परम्परागत दलहरूलाई सत्ताबाट निष्क्रिय बनाउने समय आएको बताए।

चितवनलाई परिवर्तनको प्रारम्भिक केन्द्रका रूपमा चित्रित गर्दै उनले यहीँबाट त्यसलाई टुंगोमा पुर्‍याइने बताए। उनले मतदातासँग आफ्नो पार्टीलाई समर्थन गर्न आग्रह गरे।