काठमाडौं । प्रधानमन्त्री वालेन्द्र शाहले नेपाल–भारत सीमा विवाद समाधानका लागि कूटनीतिक पहल जारी रहेको बताउँदै नेपालले मात्र नभई भारतले पनि केही स्थानमा एकअर्काको भूमि अतिक्रमण गरेको तथ्य आफू प्रधानमन्त्री भएपछि थाहा पाएको बताएका छन्।

आइतबार प्रतिनिधिसभा बैठकमा श्रम संस्कृति पार्टीका सांसद आरेन राईको प्रश्नको जवाफ दिँदै प्रधानमन्त्री शाहले सीमा विवादबारे नयाँ तथ्यहरू आफूले प्रधानमन्त्री बनेपछि जानकारी पाएको उल्लेख गरे।

उनले भने, “म प्रधानमन्त्री भएपछि थाहा पाएको हो। भारतले नेपालको मात्रै होइन, नेपालले पनि धेरै ठाउँमा भारतको सीमा मिचेको रहेछ। यो विषयलाई टेबल टकमार्फत साथीका रूपमा बसेर छलफल गरी समाधान गरिनेछ।”

लिपुलेक, कालापानी र लिम्पियाधुरा लगायतका सीमा विवादका विषयमा सरकार गम्भीर रहेको बताए। उनले यी विषयलाई मित्रवत् संवाद र कूटनीतिक माध्यमबाट समाधान गरिने स्पष्ट पारे।

प्रधानमन्त्री शाहले नेपाल–भारत सम्बन्धलाई थप सुदृढ बनाउँदै दुवै देशका सरोकार र संवेदनशीलतालाई ध्यानमा राखेर सीमा सम्बन्धी विवादहरू समाधानतर्फ अघि बढाइने बताए। उनले लिपुलेक, कालापानी र लिम्पियाधुरासहितका विषयमा सरकारले कूटनीतिक माध्यमबाट दीर्घकालीन समाधान खोजिरहेको जानकारी दिए।