काठमाडौं– पछिल्लो समय आफ्नो सक्रियता बढाउँदै लगेका पूर्वराजा ज्ञानेन्द्र विर विक्रम शाह आइतबार बाराको सीमरा जाने भएका छन् ।

पारिवारिक भ्रमणको लागि भन्दै शाह सीमरा जान लागेको बताइएको छ ।

अंग्रेजी नयाँ वर्षको अवसरमा पोखरामा गरेर राजावादीसँग भेटघाट र गोप्य छलफल गरेका ज्ञानेन्द्र शाहले सीमरामा पनि त्यस्तै खालको भेटघाट गर्ने बताइएको छ । यस्तै उनी त्यहाँ रहेका विभिन्न शक्तिपिठको दर्शनमा पनि सहभागि रहनेछन् ।

पूर्वराजा निकट स्रोतका अनुसार उनी पूर्वरानी कोमल राज्यलक्ष्मी शाहसहित बुद्ध एयरको विमानमार्फत अपरान्ह ४ बजे सीमरा प्रस्थान गर्नेछन् ।

पूर्वराजा ज्ञानेन्द्र र पूर्वरानी कोमलसँगै निजी सचिव सागर तिमल्सिना र निजी सुरक्षा गार्ड सशस्त्रका डिएसपी शिव राउत पनि सीमरामा जानेछन् ।

सिमरा स्थित प्रभु शमसेर राणाको निवासमा शाह बस्ने कार्यक्रम रहेको छ । उनी सिमराबाट पूर्वी तराईको भ्रमणमा निस्कनेछन् ।

पूर्व राजाको सुरक्षा सहितको सवारी साधन भने यसअघि नै सिमरा पुगिसकेको बताइएको छ । करिब दुई साता सिमरा बसाई पछि ज्ञानेन्द्र परिवार सडक मार्गबाट दमक जाने बुझिएको छ ।