काठमाण्डौ
देशका मध्य तथा पश्चिम तराईमा भोलिसम्म नै तातो हावा ‘लू’ चल्ने जल तथा मौसम पूर्वानुमान महाशाखाले जनाएको छ ।

मनसुन सुस्त गतिमा रहेकोले मध्य तथा पश्चिम तराईमा अत्याधिक गर्मी यथावत् नै रहने मौसमविदको भनाई छ ।

पश्चिमतिर फैलिन केही दिन लाग्छ, उहाँले भन्नुभयो,‘मनसुन प्रणाली केही कमजोर रहे पनि केही ठाउँमा पानी पर्नेछ ।’ मनसुन फैलिन अनुकूल अवस्था नहुँदा पश्चिमतिर फैलिन नसकेको मौसमविद्को भनाई छ ।

अहिले देशको पूर्वी तथा मध्य भागमा मनसुनी प्रणालीको प्रभाव रहेको छ भने बाँकी ठाउँमा स्थानीय वायु र पश्चिमी वायुको आंशिक प्रभाव रहेको छ ।
गएको जेठ ३१ गते बुधबार नेपालको पूर्वी भेग भएर मनसुन भित्रिएको थियो । मनसुन क्रमिकरुपमा फैलिरहेको र यो देशभर फैलिन अझै केहि दिन लाग्ने महाशाखामा मौसमविद् गोविन्द झाले जानकारी दिए ।

अहिले देशका पहाडी क्षेत्रमा मौसम बदली भएको छ । कोशी प्रदेशसहित देशका पहाडी क्षेत्रमा मौसम आंशिकदेखि सामान्य बदली रहेको जल तथा मौसम पूर्वानुमान महाशाखाले जनाएको छ ।

आज कोशी, बाग्मती र गण्डकी प्रदेशका केही ठाउँमा र बाँकी थोरै पहाडी भागमा मेघगर्जन र चट्याङ्गसहित हल्कादेखि मध्यम वर्षाको सम्भावना रहेको महाशाखाका मौसमविद् झाले बताए । उनका अनुसार आज राति कोशी प्रदेशको एक–दुई ठाउँमा ठूलो पानी पर्न सक्ने अनुमान छ ।