काठमाडौं : प्रधानमन्त्री पुष्पकमल दाहाल प्रचण्डले राष्ट्रिय क्रिकेट टोलीलाई शुभकामना दिएका छन्। बुधबार बिहान भर्चुअल माध्यमबाट प्रधानमन्त्री प्रचण्डले पाकिस्तानमा रहेको क्रिकेट टोलीलाई जितको शुभकामना दिएका हुन्।

‘बेस्ट अफ लक, राम्रो गर्नुहोस्। देश तपाईंहरु साथमा छ,’ उनले भने।

एसिया कपको डेब्यू खेलमा आज नेपालले विश्व  नम्बर वान टोली  एवं आयोजक पाकिस्तानसँग खेल्दैछ।  नेपाल र पाकिस्तानबीचको खेल मुल्तान क्रिकेट रंगशालामा नेपाली समय अनुसार अपरान्ह सवा ३ बजे सुरु हुनेछ।

पहिलो पटक एसिया कप खेल्न लागेको नेपालले पहिलो खेलमै आयोजक तथा २ पटकको विजेता पाकिस्तानसँग खेल्न लागेको हो।  एसिया कप खेल्ने नेपालको सपना दशक अगाडि देखि थियो। यो मौका सन् २००५ मा पनि जुरेको थियो। नेपाल छनोट भयो । तर कार्गिल युद्धको कारण त्यो संस्करण नै हुन सकेन।‌