बुटवल,

सशस्त्र प्रहरीले रुपन्देहीकाे मायादेवि गाउपालिका स्थित एक इटाभट्टाबाट करिब १६ लाख बराबरको अवैध लत्ताकपडा बरामद गरेको छ ।

सशस्त्र प्रहरी बल ,नेपाल प्रस्तावित सीमा सुरक्षा गुल्म डण्डा रुपन्देहीबाट खटिएको गस्ती टोलीले करिब १६ लाख मूल्य बराबरको अवैध लत्ताकपडा बरामद गरेको हो ।

विशेष सूचनाको आधारमा गुल्मबाट सशस्त्र प्रहरी नायव उपरीक्षक (डिएसपी) प्रदिप कुमार बस्नेतको कमाण्डमा खटिएको १० जनाको मोबाईल गस्ती टोलीले आइतबार उक्त सामान बरामद गरेको सशस्त्र प्रहरीले जनाएको छ ।

रुपन्देहीको मायादेवी गाउँपालिका-५ स्थित पकडी ईलाकामा अवैध रुपमा भारतबाट नेपाल ल्याई ईट्टाभट्टामा लुकाईछिपाई राखिएको ६ बन्डल लत्ताकपडा बरामद गरिएको सशस्त्र प्रहरीकाे भनाइ छ ।

सशस्त्र प्रहरीका अनुसार १५ लाख ९१ हजार ३ सय रुपैयाँ कायम मूल्यमा उक्त लत्ताकपडा भैरहवा भन्सार कार्यालय, बेलहियामा बुझाइएको छ ।