नवलपरासी, पूर्व–पश्चिम राजमार्ग अन्तर्गत नवलपरासीको दाउन्ने खण्ड एकतर्फी सञ्चालनमा रहेको छ । नवलपरासी पूर्वको दाउन्ने विश्वकर्मा मन्दिर क्षेत्रमा सडक चिप्लो भएका कारण उकालोमा गाडी चढ्न सकेका छैनन् ।

पानी परेपछि सडक हिलाम्मे भएकाले हिजो बेलुकादेखि नै समस्या भएको र गाडीको लामो जाम रहेको जिल्ला प्रहरी कार्यालय नवलपरासी पूर्वले जनाएको छ । सयौँको संख्यामा यात्रु दाउन्नेमा अलपत्र परेका छन् ।

आज बिहान पनि हल्का पानी परिरहेको र घाम नलाग्दासम्म सडक सहज हुने अवस्था नरहेको प्रहरीको भनाइ छ । उकालोमा ठूला गाडी फस्ने गरेका कारण दाउन्ने क्षेत्रमा पटक–पटक यात्रुले सास्ती झेल्दै आएका छन् ।