काठमाडौं – लगातार पहिरो खसिरहेकाले मुग्लिन–नारायणगढ सडकखण्ड आज रातभर पनि बन्द हुने भएको छ । जिल्ला प्रहरी कार्यालय, चितवनका एसपी गोविन्द पुरीका अनुसार शनिबारदेखि रोकिएको सवारी आवागमन आइतबार बिहानसम्म खुल्न नसक्ने अवस्था देखिएको हो ।

‘आज रातभर सडक नखुल्ने भयो । पहिरो निरन्तर आइरहेकाले अवरोध हटाउन सकिएन,’ एसपी पुरीले जानकारी दिए, ‘भोलि बिहान ४–५ बजेदेखि काम सुरु हुन्छ, तर मध्यान्ह १२ बजेअघि सहज आवागमन हुने देखिँदैन ।’

चितवनको इच्छाकामना गाउँपालिका–६ स्थित तुइन खोलामा शुक्रबार रातिदेखि लगातार पहिरो खसिरहेका कारण सडक अवरुद्ध भएको हो । सडक अवरोधका कारण धेरै यात्रुहरू बाटोमै अलपत्र परेका छन् ।

प्रहरी र जिल्ला प्रशासन कार्यालयले शनिबार दिउँसो अलपत्र यात्रुका लागि पानी र खानाको व्यवस्था गरेका थिए । राजमार्ग आसपासका व्यवसायीलाई पनि यात्रुको सहजीकरणका लागि सहयोग गर्न अनुरोध गरिएको छ ।

सडक अवरोधले दशैं नजिकिँदै गर्दा यात्रुहरू थप समस्यामा परेका छन् । अवरोध मुग्लिनबाट करिब २.५ किलोमिटर नारायणगढतर्फ परेको हो । अहिले राजमार्गको दुवै तर्फ सवारी साधनको लामो लाइन लागेको छ ।

यस्तै, सडक समस्या समाधानका लागि भौतिक, पूर्वाधार तथा यातायात मन्त्रालयमा शनिबार दिउँसो छलफल भएको थियो । मन्त्री कुलमान घिसिङले सडक छिटो खोल्ने र वैकल्पिक व्यवस्था गर्न सम्बन्धित निकायलाई निर्देशन दिएका छन् ।