पाल्पा , पाल्पाको माथागढी गाउँपालिका-७ रहबासमा शनिबार हिजो साँझ टिपर दुर्घटना हुँदा ३ जनाको मृत्यु भएको छ । जिल्ला प्रहरी कार्यालय पाल्पाका अनुसार लु २ ख ४५२५ नम्बरको टिपर दुर्घटना हुँदा अर्का एक जना गम्भीर घाइते भएका छन् ।

दुर्घटनामा परी टिपर चालक अर्घाखाँची सितगंगा नगरपालिका-४ सिद्धाराका २६ वर्षीय चिन्ता बहादुर सुनार रहेका छन् । अन्य २ जनाको विवरण खुल्न नसकेको प्रहरीले जनाएको छ । माथागढीको रहबास स्थित झडेवा-रहबास भित्री कच्ची सडक खण्डमा झडेवाबाट रहबास चुनढुङ्गा खानी तर्फ जाँदै गरेको खाली टिपर सडकबाट अन्दाजी ५० मिटर तल खसेको थियो । उक्त दुर्घटनामा पाल्पा तानसेन नगरपालिका-१० पटुवा बस्ने ३३ वर्षीय राजन चिदी गम्भीर घाइते भएका छन् ।

घार्ईतेहरुको उद्धार गरी उपचारको लागि लुम्बिनी मेडिकल कलेज प्रभासमा पठाइएकोमा ४ जनालाई अस्पताल पुर्याई चेक जाँच गर्दा ३ जनालाई चिकित्सकले मृत घोषणा गरेका थिए । दुर्घटना सम्बन्धी थप अनुसन्धान भईरहेको प्रहरीले जनाएको छ ।