काठमाडौं –  आज बस्ने प्रतिनिधिसभाको  बैठकमा अमेरिकी सहयोग मिलेनियम च्यालेन्ज कर्पोरेशन एमसीसीबारे छलफल हुने भएको छ। संघीय संसदले सार्वजनिक गरेको सम्भावित कार्यसूचीमा एमसीसीको विषयमा छलफल हुने उल्लेख छ।

संघीय स‌‌सद सचिवायलका प्रवक्ता रोजनाथ पाण्डेले आज बस्ने बैठकमा एमसीसी सम्झौता छलफलका लागि अर्थमन्त्री जनार्दन शर्माले प्रस्तुत गर्ने सम्भावित कार्यसूची रहेको जानकारी दिए।

गत आइतबारको प्रतिनिधिसभा बैठकमा सञ्चार तथा सूचना प्रविधिमन्त्री ज्ञानेन्द्रबहादुर कार्कीले एमसीसी सम्झौता स‌ंसदमा पेश गरेका थिए। एक बजे  प्रतिनिधिसभाको बैठक बस्नु अघि ११ बजे कार्यव्यवस्था परामर्श समितिको बैठक समेत बस्ने पाण्डेले जानकारी दिए। भोलिको बैठकमा एमसीसी  दफाबार छलफल गर्ने वा आज नै अर्को बैठक बसेर पास र फेल समेत गर्न सक्ने छ।

कांग्रेसको ह्वीप 

नेपाली कांग्रेसले आज बस्ने प्रतिनिधिसभा बैठकमा आफ्नो दलका सबै सांसदलाई अनिवार्य उपस्थित हुन निर्देशन जारी गरेको छ। कांग्रेस सचेतक पुष्पा भुसालले आफ्ना सबै सांसदलाई बैठकमा अनिवार्य उपस्थित हुन निर्देशन जारी गरिएको जानकारी दिइन्। आजको संसद बैठकमा अमेरिकी सहयोग परियोजना एमसीसीमाथि सैद्धान्तिक छलफल हुने भन्दै कांग्रेसले अनिवार्य उपस्थित हुन भनेको हो।

लोसपा एमसीसीको पक्षमा

लोकतान्त्रिक समाजवादी पार्टी (लोसपा)ले एमसीसी सम्झौताको पक्षमा मतदान गर्ने भएको छ।

बुधबार काठमाडौंमा बसेको लोसपा संसदीय दलको बैठकले संसद्‌मा टेबल भएको एमसीसी सम्झौताको पक्षमा मतदान गर्ने निर्णय गरेको लोसपा सांसद एकवाल मियाँले जानकारी दिए। प्रतिनिधि सभामा लोसपाका १३ सांसद छन्। लोसपाले आफ्ना सांसदहरूलाई प्रतिनिधि सभा बैठकमा अनिवार्य उपस्थितिका लागि निर्देशन समेत दिएको छ।

एमालेको अडान 

नेकपा एमालेले पार्टीले कारवाही गरेका १४ जना सांसदलाई पदमुक्त नगरेसम्म एमसीसीको प्रक्रियामै भाग नलिने बताएको छ।  एमालेका महासचिव शंकर पोखरेलले संसदको अवरोध कायमै राख्ने बताउँदै आफ्नो माग पूरा नभएसम्म संसदीय प्रक्रियामै भाग नलिने बताए।

उनले सत्तामा सहभागी एउटा पक्षले प्रस्ताव टेबुल गर्ने र अर्को पक्षले सरकारकाविरुद्ध सडकमा ढुंगामुढा गरेर रमिता देखाएको आरोपसमेत लगाएका छन्।

माओवादी र एकीकृत समाजवादी विपक्षमा

सत्ता घटक नेकपा माओवादी केन्द्रले भने एमसीसीको विपक्षमा मतदान गर्ने बताएको छ। माओवादी केन्द्रको स्थायी समिति बैठकले एमसीसीको विपक्षमा उभिने निर्णय गरिसकेको छ। अध्यक्ष प्रचण्डले सभामुख अग्नि सापकोटालाई हटाउन लागेकोले मात्रै एमसीसी टेबल गर्न दिएको बताएका छन्।

यस्तै अर्को सत्ता घटक एकीकृत समाजवादी पार्टीले पनि एमसीसीको विपक्षमा मतदान गर्ने निर्णय गरेको छ। समाजवादीको सचिवालय बैठकले विपक्षमा मतदान गर्ने निर्णय गरिसकेको सम्मानित नेता झलनाथ खनालले जानकारी दिए।