बुटवल

प्रधानमन्त्री एंव नेकपा माओवादी केन्द्रका अध्यक्ष पुष्पकमल दाहाल प्रचण्डले परिवर्तन उल्ट्याउन खोज्नेहरुविरुद्ध समाजवादी मोर्चा बनेको बताएका छन । समाजवादी मोर्चा नेपाल लुम्बिनीले आज बुटवलमा गरेको सन्देशसभालाई सम्बोधन गर्दै उनले प्रतिक्रियावादी शक्तिहरुले जातीय द्धन्द्ध निम्त्याएर परिवर्तन उल्ट्याउने प्रयत्नमा लागेको बताएका हुन । एमाले अध्यक्ष केपी आली प्रति लक्षित गर्दै उनले मोर्चा भन्दा बाहिरका शक्तिहरु नक्कली भएको बताए । ‘यो मोर्चाभन्दा बाहिर रहेका शक्तिहरु नक्कली हुन । पटक पटक संविधान मिच्ने र संसद विघटन गर्ने नेताबाट कुनै आन्दोलनको नेतृत्व हुन सक्दैन’ उनले भने ।

नेपालमा गणतन्त्र स्थापना र संविधान सभाको निश्कर्ष चुनवाङ बैठकले गरेको स्मरण गर्दै उनले कम्युनिष्ट आन्दोलनका वादहरु विवादमा पुगेकै कारण समाजवादी मोर्चाको आवश्यकता भएको बताए । ‘गणतन्त्र जनताको हुने हो वा बुर्जवाहरुको, श्रमिक वा पूजीपतीहरुको हुने हो, त्यसैको लागि यो मोर्चा बनेको छ’ दाहालले भने । मुलुकमा अहिले परिवर्तन उल्ट्याउन जातीय द्धन्द्ध निम्त्याउन खोजिएको भन्दै उनले समाजवादी गणतन्त्रमा रुपान्तरण गर्नका लागि मोर्चाबन्दी गरिएपछि चौतर्फी घेराबन्दी शुरु भएको दावी पनि गरे । मोर्चाले लाखौं जनता सडकमा उतारेर समाजवादको मोडल प्रस्तुत गर्ने पनि बताए ।

प्रधानमन्त्री दाहालले सरकारमा बस्नका लागि अनुचित काम नगर्ने पनि बताए । आफू प्रधानमन्त्री भएपछि एक महिना पनि टिकिन्न की भन्ने लागेपनि सबैको साथले अहिलेसम्म टिकिराखेको बताए । ‘प्रतिपक्षी साथीले संसदमा अनेक गर्नुभएको छ, तर पनि चिज अगाडि बढेकै छ, बढ्छ’ उनले भने । सरकारमा बस्न कै लागि जे पनि गर्छ की भन्ने भ्रममा नपर्न आग्रह गर्दै भने ‘सुशासनका लागि एक पछि अर्को कदम चालीरहेकै छौं र अझैपनि हेर्दै जानु होला के के हुन्छ’ ।

एमसिसिका बिषयमा आफू प्रधानमन्त्रीको रुपमा धेरै बोल्न नमिल्ने बताउँदै राष्ट्रियत र स्वाधिनताको रक्षाकालागि आफनो लडाइ जारी रहेको बताए । अनुदान लिएर देशको हितमा विकास गर्ने गरी योजनालाई अगाडि बढाउने भन्दै उनले एमसिसिकालागि आफुलाइ विश्वास गर्न आग्रह पनि गरे ।

सुशासनको पक्षमा सरकारले चालेका कदमबाट जनतामा आशा र भरोसा जागेको बताए । भ्रष्टाचार नियन्त्रण, सुशासनका पक्षमा सरकार लागि परेको बताउँदै अर्थतन्त्र सुधारका लागिराष्ट्र बैंकसँग निरन्तर छलफल गरिरहेको बताए ।