काठमाण्डौ – काठमाण्डौ उपत्यकासहित देशका विभिन्न ठाउँमा बिहानैदेखि हावाहुरी मेघगर्जन र चट्याङसहितको वर्षा भइरहेको छ ।

काठमाण्डौ उपत्यका लगायत वरिपरि क्षेत्रमा ठुलो हावाहुरी गराउने प्रणाली थप सक्रिय भएर मेघगर्जन र चट्याङ सहित वर्षा भइरहेको मौसमविद्ले बताएका छन् ।

आज बिहानैदेखि गण्डकी, लुम्बिनी , कर्णाली र बागमती प्रदेशमा पानी परिरहेको जल तथा मौसम पूर्वानुमान महाशाखाले जनाएको छ ।

देशमा पश्चिमी वायु तथा स्थानीय वायुको प्रभाव र अरब सागरबाट भित्री रहेको जलवाष्पयुक्त हावाको समेत प्रभाव थपिँदा विभिन्न ठाउँमा वर्षा भइरहेको महाशाखाको भनाइ छ ।

महाशाखाका अनुसार सुदूरपश्चिम, कर्णाली र लुम्बिनी प्रदेशलगायत देशको पहाडी भू-भागका थोरै ठाउँहरुमा तथा बाँकी भूभागका एक-दुई ठाउँमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ ।

देशको उच्च पहाडी तथा हिमाली भूभागका थोरै ठाउँहरुमा हिमपातको समेत सम्भावना रहेको छ ।