काठमाण्डाै – प्रतिनिधिसभाको बैठक पर्सि बिहीवार बिहान ११ बजेसम्मका लागि स्थगित भएको छ ।

दिउँसो १ बजेका लागि तय भएको बैठक ढिला गरी शुरू भएकोमा राष्ट्रिय स्वतन्त्र पार्टी (रास्वपा) का सांसदहरूले नाराबाजीसहित बेल घेराउ गरेपछि सभामुख देवराज घिमिरेले कार्यसूचीमा प्रवेशै नगरी आधा घण्टाका लागि स्थगित गर्नुभएको थियो । त्यसपछि संसद् सचिवालयले सूचना टाँसेर दिउँसो साढे ४ बजेसम्मका लागि स्थगित गरेकोमा फेरि शुरू नै नभई सचिवालयले सूचना टाँसेर बिहीवार बिहान ११ बजेसम्मका लागि स्थगित गरेको हो ।

रास्वपाले भिजिट भिसा प्रकरणमा गृहमन्त्री रमेश लेखकको राजीनामा र छानबिन समितिको माग गर्दै आएको छ । हिजो र अस्ति रास्वपाको नाराबाजीकै बीच सभामुख घिमिरेले जबरजस्ती बैठक अघि बढाउनुभएको थियो । तर आज रास्वपाका सांसदहरूको पोशाकलाई लिएर सत्तारूढ नेपाली कांग्रेसका प्रमुख सचेतक श्याम घिमिरेले प्रश्न उठाएपछि सभामुख घिमिरेले तत्कालै बैठक स्थगित गर्नुभयो ।

आज रास्वपाका सांसदहरूले मानव तस्करी र मानव बेचबिखनविरुद्धको आवाजको प्रतिनिधित्व भन्दै नीलो रिबन लगाएर बैठकमा उपस्थित भएका थिए । कांग्रेस प्रमुख सचेतक घिमिरेले त्यो रिबन मर्यादित पोशाकमा पर्छ कि पर्दैन भन्ने यकिन गर्नुपर्ने माग गर्नुभयो ।