काठमाण्डौ – नवनियुक्त कृषि तथा पशुपक्षी विकासमन्त्री डा। मदनप्रसाद परियारले पदभार ग्रहण गर्नुभएको छ । आज राष्ट्रपति कार्यालयमा पद तथा गोपनीयताको शपथ ग्रहण लगत्तै सिंहदरबारमा रहेको कार्यालय पुगी उहाँले पदभार ग्रहण गर्नुभएको हो ।

पदभार ग्रहण गर्दै मन्त्री परियारले नेपाल र कोरियाबीच आलु र धानबालीमा अनुसन्धान गर्न यसअघि भएको सम्झौतालाई कार्यान्वयन गर्न समन्वय समिति गठन गर्ने प्रस्ताव सदर गर्नुभएको छ ।

पदभार ग्रहणपछि सञ्चारकर्मीसँग कुराकानी गर्दै उहाँले चुनावलाई प्राथमिकतामा राखेर कृषि क्षेत्रमा केही फरक काम गर्ने प्रतिबद्धता जनाउनुभयो । शासकीय सुधार र बेथिति रोक्ने काममा सरकार लागिपर्ने उहाँको भनाइ छ ।

मन्त्री परियारले दुग्ध र उखु किसानका समस्याहरू समाधान गर्ने प्रतिबद्धता पनि जनाउनुभयो ।