बुटवल

नेपाल पत्रकार महासंघ रुपन्देहीले नयाँ सदस्यता सिफारिशको निर्णयलाई पुनर्विचार गरी सच्याउन तयार भएपछि महासंघ रुपन्देहीमा गरिएको तालाबन्दी खुलेको छ ।

महासंघले नयाँ सदस्यका लागि शुद्धिकरण मापदण्डविपरित, पूर्वागहीपूर्ण र स्वेच्छाचारि ढंगले सिफारिश गरेको भन्दै प्रेस चौतारी रुपन्देहीले त्यसलाई सच्याउन माग गर्दै एक साताअघि तालाबन्दी गरेको थियो । महासघले नयाँ सदस्यताको निर्णयमा कमजोरी भएको स्वीकार्दै सच्याउन सहमत भएपछि प्रेस चौतारीले महासंघमा लगाएको ताला खोलेको हो ।

महासंघका पदाधिकारी र प्रेस चौतारीका पदाधिकारीसहित शनिबार भएको छलफलमा महासंघ सदस्यता पुनर्विचार गरी सच्याउने र प्रेस चौतारीले उठाएका माग संबोधन गर्ने सहमति भएपछि तालाबन्दी खोलिएको प्रेस चौतारी रुपन्देहीका सचिव केशव भण्डारीले जानकारी दिए ।

महासंघको यही साउन ६ गते बसेको बैठकले ३२ जनालाई नयाँ सदस्यता दिने निर्णय गर्दै लुम्बिनी प्रदेश समितिमा पठाएको थियो । प्रदेश समितिले पनि त्यसमा पुनर्विचार गर्न भन्दै जिल्लालाई नै फिर्ता पठाएको थियो ।