बुटवल,
लुम्बिनी प्रदेशका मुख्यमन्त्री चेतनारायण आचार्यले लुम्बिनी प्रदेशको शैक्षिक गुणस्तर र नतिजा सुधारका लागि निर्मम समीक्षा गर्न आवश्यक रहेको बताएका छन् ।
रुपन्देहीको तिलोत्तमा नगरपालिका–२ योगिकुटीस्थित जनजागृति माध्यमिक विद्यालय ५२ औं वार्षिकोत्सव तथा अभिभावक दिवस उद्घाटन कार्यक्रमलाई सम्बोधन गर्दै मुख्यमन्त्री आचार्यले सामूदायिक विद्यालयको नतिजा र गुणस्तर सुधार गर्न निर्मम समीक्षा गर्नुपर्ने बताएका हुन् । उनले नतिजा खस्कनुको पछाडीको कारण खोज्नुपर्ने, त्यसका लागि शिक्षा विज्ञहरुले भूमिका बढाउनुपर्ने र सुधारका विकल्पहरु अघि सार्न आग्रह गरे ।‘लुम्बिनी प्रदेशको गत वर्षको एसईईको नतिजाले झस्काएको छ । त्यसलाई सुधार गरेर अघि जानुपर्ने छ । यसका लागि निर्मम समीक्षा गरेर जानुपर्ने छ’उनले भने,‘गत वर्षको नतिजाले गम्भिर र चिन्तित बनाएको छ ।’

विद्यालय व्यवस्थापन समितिका अध्यक्ष प्रेम प्रसाद भुसालको अध्यक्षता तथा मुख्यमन्त्री चेतनारायण आचार्यको प्रमुख आतिथ्यतामा विद्यालयको वार्षिकोत्सवको उद्घाटन गरिएको थियो ।