बुटवल,  बुटवलमा नेवाः सेवा समितिको १५ औं सृङ्खलाकारुपमा नेवास् कन्याहरुको सामुहिक ईहि यज्ञ बेलबिवाह तथा बालकहरुको क्येटा पुजा ब्रतबन्ध शुरु भएको छ । नेवाः सेवा समितिले विगत १५ वर्षदेखि लगातार आयोजना गर्दै आएको नेवाः परम्परा र संस्कृतिमा महिनावारी हुनुभन्दा अघि कन्याको बेलसंग बिवाह र कर्म चलाउने प्रारम्भीक प्रक्रिया अनुरुपको बालकहरुको क्येटा पूजा आजबाट सुरु भएको हो ।

नेवार पण्डित हरिशरण राजोपाध्यायले आईतबार औपचारिक रुपमा विधिवत पुजापाठ गरि ईहि पूजाको शुरु गरे । सो अवसरमा बोल्दै उनले नेवार समुदायमा महत्वपुर्ण मानिएको ईहि यज्ञ गराएर कन्याहरुलाई धार्मिक, सास्कृतिक मान्यता अनुसार ज्ञानहरु दिईएको बताए । परिवारबीच बोलिचालीको क्रममा नेवारी भाषालाई प्राथमिकता दिन उनले समुदायलाई सुझाव दिँदै नया पिँढीलाई संस्कृति सिकाउन जरुरी रहेको उल्लेख गरे ।

कार्यक्रममा बोल्दै समितिका अध्यक्ष चिरञ्जीवी श्रेष्ठले यस क्षेत्रमा छरिएर रहेका नेवार समुदायहरुलाई एकतावद्ध गरि भाषा, संस्कृति र संस्कार जर्गेना हुने गरि कार्यक्रम गर्दै आएको बताए । समुहमा गर्दा आर्थिक रुपमा सहज हुनुका साथै एक आपसमा परिचय हुने हुदा पनि सामुहिक कार्यक्रमको महत्व रहेको उनले बताए ।

ईहि यज्ञ र क्येटा पुजापछि जीवन पद्धतीको नयाँ चरण शुरु हुने भएकाले पनि यी पूजाहरुको महत्व रहेको समितिका सचिव सारदा श्रेष्ठले बताईन् ।

दुई दिनसम्म चल्ने कार्यक्रममा रुपन्देहीसहित काठमाडौ, दाङ, पाल्पा, अर्घाखाची लगायत क्षेत्रबाट ५१ कन्या, १५ बटुकहरु सहभागी भएको कार्यक्रम संयोजक लिला प्रसाद श्रेष्ठले जानकारी दिए । पूजा सुरुहुनजु पूर्व ूथानीय भुपूसैनिक हलबाट निकालिएको प्रभातफेरी देविनगर नेवाः भवन भएर कालिकानगर होराईजन चोक हुदै भुपुसैनिकमै पुगेर पूजामा परिणत भएको महिला संयोजक लिला ध्वजुले बताईन ।