बुटवल, साउन १९ — बुटवल–पाल्पा सडकखण्डमा सवारी आवागमन पूर्ण रूपमा रोकिएको छ। लगातारको वर्षाका कारण पहिरो खस्ने उच्च जोखिम देखिएपछि सडक बन्द गरिएको हो।

राजमार्ग सुरक्षा तथा ट्राफिक व्यवस्थापन कार्यालय बुटवलका अनुसार हिजोदेखि नै परेको अविरल वर्षाले सिद्धबाबा क्षेत्र आसपासमा स–साना पहिरो खस्न थालेका छन्। यसै कारण सम्भावित जोखिमलाई ध्यानमा राख्दै ट्राफिक प्रहरी कार्यालयले बुटवलबाट पाल्पातर्फ जान चाहने सवारी साधनलाई गोलपार्कमै रोकेको जनाएको छ।

“सडकमा थप पहिरो खस्न सक्ने सम्भावना रहेकाले सुरक्षा सावधानीस्वरूप आवागमन रोकिएको हो,” ट्राफिक कार्यालयका एक अधिकृतले जानकारी दिए।

सिद्धबाबा सडकखण्ड भूस्खलनका कारण नियमित रूपमा प्रभावित हुँदै आएको क्षेत्र हो। हाल सडक खुलाउने प्रयास सुरु गरिएको जनाइएको छ। यात्रुहरूलाई आवश्यक जानकारीका लागि स्थानीय ट्राफिक कार्यालयको सम्पर्कमा रहन पनि आग्रह गरिएको छ।