बुटवल,
अज्ञात समूहको गोली प्रहारबाट रुपन्देहीमा एक जना युवा घाइते भएका छन् ।

जिल्लाकाे सियारी गाउँपालिका-३ का २० वर्षीय वीरेन्द्र केवटलाई बुधबार साँझ अज्ञात समूहले गोली प्रहार गरेका हुन् ।

अपरिचित ब्यक्तिहरूकाे समूहले उनलाई घेरा हालेर मोबाइल लुट्ने प्रयास गरेको र त्यसक्रममा केवटले मोबाइल जोगाउन खोज्दा गोली हानिएको जिल्ला प्रहरी कार्यालयका रूपन्देहीका प्रहरी नायव उपरीक्षक श्यामु अर्यालले जानकारी दिए । केवटको खुट्टामा गोली लागेको छ । उनलाई भीम अस्पतालमा सामान्य उपचारपछि लुम्बिनी प्रादेशिक अस्पताल बुटवल पठाइएको छ । घाइतेको अवस्था सामान्य रहेको प्रहरीले जनाएको छ ।

घटनामा संलग्नको खोजी कार्य र घटना अनुसन्धान जारी रहेको प्रहरी नायव उपरीक्षक अर्यालले बताए ।